TRADUSIOUN:
Gia' intoren a la mete' di an novanta, a gh'era bele un di piu' gros problema ch'i tormeinten i soven e i strasoven: sa fomia, come mai an gh'e' mai gninta da fer che' datoren, perche' a g'ho da ciucerem un sac ed chilometer per cater un post cum as dev, ma chi mal fa fer, e casein dal gener.
L'e' andeda acse' che per sercher d'ander counter a tut cal sibaldoun che', in dal nuantasinc (1995), dopo l'enesima sira paseda a bever come di puos a tavlein in un bar, quater g't i deciden cl'e' ora ed dereg un taj.
E fin che' tut a som dacordi, ma al problema l'era "sa' fer": a gh'ivem in dla mazocla ed cater quel ed verameint originel, d'ander counter a tut chi comportameint da brev ragas ca bisogna aver per ander dacordi con chi eter, ma ed ferel in manera d'ander mia a ciaper dal sansioun dal stet. Elora via a pinser e a sciancheres al servel per minut, ori, de' inter, a volti anc per dal smani, po' tut in un colp, la lus: la balorda l'era gnuda al mond cat gnis un cancher!
Quel cl'ha catee fora al nom, l'ha pinsee a la "Popolarissima delle Palme", cursa per ginta seria in bicicleta intoren a Cherp (Carpi).
Pinsee: na gara in bici per puos, dove a nes pol mia bever gninta can sia mia alcolic, e in piu' al ristoro, obligatori da regolameint, dove te ghe da magner grasoi, murtadela, salam ecc. (l'e' al porc al noster piu' grand amig, mia al can). Oviameint durant la competisioun te po fer tuti al vigliacherii cat selta in meint, seinsa pero' ander counter a la legislasioun italiana. Praticameint te po manometer la bici ed chi eter, ciaper dal scorciatoi, fer ciaper la bala a l'aversari, der di chels e tut quel cat selta in meint.
Avriset scumi's c'ag l'arisem caveda?
No ah?
Beh, invece nueter a l'om fat.
A la prima edisio'un, per forsa ed lavor sol per poca ginta, i partecipen circa na trinteina ed brut soget, ginta che te neg daris mia seint franc, di bevidor ed 'na volta, dla bruta ginta. Al ritrovo l'e' ste davanti al sagree dal Dom per fer na foto tut insem, per po' spusteres a S.Martein a la trattoria ed Baldein. Tri gir ed campagna con du ristori in riva al Secia e a la fi'n as riveva insima al pount.
In manera che tut l'e' andee per al vers giust e, propria per cal mutiv che', agli edisioun sucesivi in stedi di gros suces. In particoler la versioun dal 1998 con un sa'c da ginta, ma talmeint tanta ginta che l'organisasioun la s'e' cateda in breg ed tela per saltereg fora.
L'e' andeda acse' che la Balorda l'e' dvinteda n'apuntameint per i mat dal paes, puos, tiraterdi, poeti, 'nimel e beli doni. Ad un cert punt i travestimeint e l'utilis ed bici modifichedi i tosen al sopraveint.
Quela la gh'iva da eser l'ultma, la mitica fine dla meravigliosa storia dla Balorda.
An n'ivem pero' mia fat i count con al rest dal mond: dopo un period ed relativa calma al Comitee Fat per l'Organisasioun dal Giti, dal mumeint che tanta ginta l'andeva a dree, al decid ed riprender l'ativitee.
L'e' l'inisi ed l'apoteosi.
L'edisioun dal Giubileo ed Gargal la ved anc la partecipasioun ed la Madona ed Gargal in persouna cla da' al benvenuto ai partecipant. Na masneda ed balord (circa duseint tra partecipant e ginta cag tira al cul a fer tut) in travestimeint da bibbia, tandem multipli e bici trasformedi, las riversa pral stredi ed la frasioun ed Cherp tra stupor e confusioun ed la ginta cla steva la'.
Vist che a psivem druer anc al parco, i nasen i prim firein tra partecipant e la gara la dveinta semper piu' popolera seinsa perder al spirit anti-sportiv d'avanguardia.
A seguir a sete'mber l'edisioun Gay Pride, un po' per par condicio, un po' acse', un po' anc (sopratut) per veder se tra nueter a gh'era un quel nader.
Inco as pies pinser che a sarise ste' impusibil tgnir un fenomen dal gener sol per quater gat, perche' la Balorda l'e' deinter ad ogni cristian fin dal prim mumeint cal nas.
In di an i noster och i han vist di lavor che ueter cristian a ne psi gnanc immaginer: come as pol desmingheres dal frontel d'Alberto Mai con na machina ferma, l'ariv dal bechin ed S. Martein vistii a l'antiga con bicicleta d'na volta, al tandem-usel di ragas ed Rio, la Madona ed Gargal interpreteda da na fantastica Deca, al dio Bacco interpretee da Mura in mudanda e foj d'alloro?
A livel organisativ a iom semper avu al problema ed cater un post ca gla cavis ad ospiter na mucia da ginta imbariega dura insi'ma a do rodi, un post con un gran parcheg e posibilmeint un bar, un post in man a ginta con voja ed divertires. Lavor dal gener i esisten a ste mond, ma in dimondi dificil da cater: a som ste costret a migrer tut al volti fin a quand an nom catee al post giust. Al Ritrovo Sportiv ed Sozigal (Modna).
La Baloda dal 2001, quela can n'om ancora dit, l'e' steda un suces che mai e poi mai as sarisem aspetee: an ghivem mai avu acse' tanta ginta, fotografi ed giornel lochel, forsi da l'orden, ginta lung al percors per devier al trafic, baristi, cog, servi dla gleba, spasein, tecnic dal soun, ginta basta ca sia, omen ed fadiga, un comples cal suneva, un dis gioca, al Pornognomi, e na delegasioun ed rasdori incasedi come di fascisti a fer dal gnoc frit.
L'e' nostra abitudin intitoler ogni edisio'un a un fat ed cronaca mondana, al piu' pusibil "trash". Ecco elora in di an al Trofeo Pietro Pacciani, al Trofeo Mario Vanni (cumpa'gn ed merenda dal mai trop osanee Pietro), l'edisioun dal Giubileo con Madona ed Gargal, l'edisioun Lesbo-Gay Pride con rapresentant ed tuti e do al spondi, l'edisioun dal virus B.S.E. Mucca Pazza.
E st'an?
Alsii, alsii...
Ma me' a dig ... pinsevet daboun che nueter dal Comitee Fat per l'Organisasioun dal Giti armagnisem insensibil al ches Wanna Marchi?
Ma me' a dig ... pinsevet daboun che un lavor dal ge'ner as pasis inoservee?
Ma me' a dig ... al pinsevet daboun?
Sl'e' acse' elora te nes cgnus mia a basta. Alsii che' sota.
Sgnori, sgnor, sgnureini e ragas, stee a sinti'r!
LA BALORDA EDISIOUN 2002 LAG SARA' DMENGA 12 MA'G SEMPER A SOZIGAL e la sra' dediche'da a Wanna Marchi e al Mago do Nascimiento!!!
Al via lat sara' cunsgne'da na busta con dal sel, un per ed ramet d'edera, an so quant giaroun e sinc numer da sugher al lot.
A som dre a lavurer un sac, i noster fidegh in gia' mers patoc perche' quel cav dom da bever al pruvo'm prima nueter, al noster responsa'bil dal relasio'un pu'blichi l'e' dree a fer via na riunio'un so'ta cl'e'tra, al Dis Gio'ca l'e' dree a prepare'r na seque'insa ed cansoun chi te stenderan, e al Pornognomi in dree a impar'r di nov cocktail da derev da bever.
Sgne'v quindi cla data che' ins'ma a l'agenda, e a se vdom al 12.